Научници потврдија дека минатата година била најтопла досега, но оваа 2024 година, судејќи според релевантните податоци, ќе биде уште потопла и глобалното годишно затоплување ќе надмине 1,5 степени Целзиусови, за првпат од прединдустриското време.
Ова затоплување ќе биде предизвикано, пред сè, од натамошното согорување на фосилните горива во светот, но и од природната појава на Ел Нињо, кој се јавува во интервали од 4-5 години и кој оваа зима дополнително ја загрева површината на Тихиот океан и ја зголемува температурата на планетата, покажуваат денеска објавените истражувања на климатолозите на центарот за клима во Барселона.
Годинешното затоплување, според пресметките на компјутерскиот модел, најверојатно ќе се зголеми за 1,54 степени Целзиусови, а овој тренд би можел да продолжи во текот на следната деценија.
Предвидувањата на овие научници велат дека во следните пет години, од 2024 до 2028 година, просечното топење ќе биде меѓу 1,49 и 1,79 степени Целзиусови, а дека во периодот од 2029 до 2033 година годишното топење ќе биде од 1,67 до 2 степени Целзиусови.
Членот на истражувачкиот тим, Роберто Билбао, нагласува дека оваа стапка на пораст на температурата не значи со сигурност дека климатскиот договор постигнат во Париз во 2015 година, кој зборува за забавување на затоплувањето под 1,5 Целзиусови степени, ќе биде прекршен, бидејќи овој договор се однесува на период од 20 години, но сè укажува дека светот опасно се приближува до посочената критична граница.
Доколку дојде до глобално затоплување што ја надминува стратегијата договорена во Париз, научниците предвидуваат дека ќе има смрт на коралните гребени и уништување на овие екосистеми ширум планетата, топење на мразот на Антарктикот и пораст на нивоата морињата и океаните, како и сериозни последици во земјоделскиот сектор во некои делови од светот.
Ваквото затоплување може да доведе до верижна реакција на негативни биолошки и климатски промени на планетата кои ќе бидат неповратни.