Во ексклузивното интервју за мексиканската ТВ станица N+, папата Франциск за првпат зборуваше за својата смрт и каде би сакал да биде погребан кога ќе дојде време.
Папата Франциск во разговорот истакнал дека засега не планира да поднесе оставка, а тие гласини ги смета за симпатични.
Тој, сепак, нагласи дека многу малку ќе патува во текот на 2024 година и рече дека засега е потврдено само патување во Белгија.
Кога станува збор за теми поврзани со смртта и погребот, папата откри дека и тој би сакал да биде погребан во базиликата Св. Марија Велика, која е една од четирите папски базилики.
„Како што отсекогаш ѝ ветував на Богородица, местото за погреб е веќе подготвено и сакам да бидам погребан во базиликата Света Марија Велика. Да, на тоа место затоа што сум посветен на тоа место. Секогаш одев таму. Секогаш во недела наутро. Постои многу силна и голема врска“, рече папата.
Исто така, тој се наврати на 2023 година и рече дека е многу комплицирана кога станува збор за неговата здравствена состојба.
„Да, имаше проблеми. Треба да се молите за моето здравје. Во староста нема шминка, доаѓа сама и се претставува таква каква што е. Сепак, подароците за старост мора да се прифатат. Мора да прифатиме дека многу добри работи можат да се направат од друга перспектива“, заклучи папата.