На почетокот на оваа година, кинески балон лебдеше над Америка, а Вашингтон веднаш го обвини Пекинг за шпионажа.
Кинескиот балон што го премина континенталниот дел на САД од Алјаска до источниот брег во февруари не собрал никакви информации, соопшти Пентагон.
САД „презедоа чекори за да ја ублажат“ способноста за собирање разузнавачки информации, под претпоставка дека шпионскиот балон има таква способност, изјавија официјални лица во четвртокот.
Американските разузнавачки агенции ги анализираат остатоците собрани од балонот по неговото соборување.
Инцидентот предизвика тензија меѓу САД и Кина.
Портпаролот на Пентагон, бригадниот генерал Пет Рајдер, во четвртокот изјави дека САД се „свесни дека [балонот] има способност за собирање разузнавачки информации“.
Но, „нашата проценка е дека тој не ги собрал додека бил во транзит низ или над Соединетите држави“.
Балонот леташе над САД и Канада една недела кон крајот на јануари и почетокот на февруари пред да биде соборен од борбен авион во близина на брегот на Атлантикот по наредба на претседателот Џозеф Бајден.
Вашингтон тврдеше дека шпионирал клучни воени локации ширум Америка.
Кинеското министерство за надворешни работи тогаш изрази „силно незадоволство и протест против употребата на сила на САД при напад на невооружено цивилно летало“.
Воен авион Ф-22 истрела проектил кон балонот на голема височина, а американските воени претставници соопштија дека остатоците паднале на длабочина од 14 метри, поплитко од очекуваното, во близина на Миртл Бич, Јужна Каролина.
За балонот што беше забележан на американското небо, Кина призна дека е нејзин, но ги негираше обвинувањата дека се користел за шпионажа, туку дека се работи за цивилно летало што ги следи метеоролошките услови.
Американскиот државен секретар Ентони Блинкен потоа ја одложи посетата на Пекинг поради инцидентот, но тој дојде во Кина во јуни и разговараше со највисоките кинески претставници.