Партијата Граѓани за европски развој на Бугарија (ГЕРБ) на премиерот Бојко Борисов победи на парламентарните избори во Бугарија, но не успеа да освои мнозинство, па затоа Борисов денеска предложи формирање на повеќепартиска влада на експерти, пренесе „Ало.рс“.
„Предлагам мир – да ги искористиме експертите и до декември да преземеме одговорност за борба против пандемијата, за да може повторно да се напредува“, рече Борисов, но не именуваше потенцијални експерти во таквата влада.
Иако неговата партија освои најмногу гласови, Борисов ќе има потешкотии да остане на власт, откако се повеќе луѓе гласаа за партиите кои се борат и протестираат против естаблишментот и корупцијата.
Поради тоа, наведува „Ројтерс“, не е можно да се исклучат не само повеќенеделни разговори, туку и нови избори, што значи дека Бугарија, најсиромашната членка на Европската унија, може да има потешкотии во присвојувањето на фондот на ЕУ за закрепнување од коронавирус во износ од 750 милијарди евра.
Уште шест партии покрај ГЕРБ, вклучително и три опозициски партии, се очекува да освојат места во парламентот.
По повеќедецениска доминација на бугарската политика, Борисов има малку природни коалициски партнери во распарчениот законодавен дом, а повеќето одбиваат да соработуваат директно со ГЕРБ.
Борисов (61), поранешен пожарникар и телохранител, се обиде да ги претстави своите успеси во модернизацијата на бугарската инфраструктура во покриена кампања по масовните антикорупциски митинзи минатото лето кои ја нарушија неговата популарност.
Формирањето на коалиција ја комплицира појавата на популистичката партија „Има таков народ“ на популарниот пејач и водител, Слави Трифонов, кој, според анкетата на „Галуп“, е на второ место со 17,1 отсто од освоените гласови.
Трифонов (54), чии концерти со патриотски песни привлекоа илјадници луѓе, ја отфрли можноста за коалиција со ГЕРБ и социјалистите.