Елизабет Џозеф, 66-годишна жена која се лекува во болница во Сан Антонио, е бабата на Салвадор Рамос (18), кој уби 19 деца и двајца учители во училиште во Тексас, потврдија официјални лица.
Според официјални лица, бабата на убиецот била префрлена во болница во критична состојба во вторникот, откако била застрелана од напаѓачот.
– Првото нешто што се случи е дека напаѓачот ја застрелал својата баба во лицето. Потоа таа повикала полиција. Вооружениот напаѓач побегнал, а додека бегал доживеал несреќа пред основното училиште и влетал во училиштето – изјави гувернерот Грег Абот на прес-конференција претходно во средата.
Во телевизиско интервју за Си-Ен-Ен со Волф Блицер, наредникот Ерик Естрада, службеник за јавни информации во Одделот за јавна безбедност во Тексас, ги повтори коментарите на Абот и потврди дека 66-годишната жена е бабата на убиецот.
Универзитетската болница во Сан Антонио одби да коментира за поединечни пациенти, но во соопштението од средата наутро потврди дека тие лекуваат три деца и 66-годишна жена, која сега е во критична состојба.