Европското првенство во одбојка во машка конкуренција ќе се одржи од 28 август до 16 септември следната година во Италија, Северна Македонија, Бугарија и Израел, соопшти денеска Европската одбојкарска конфедерација (ЦЕВ).
Четвртфиналето ќе се игра во Италија и Бугарија. Полуфиналните натпревари и тие за медал ќе се играат во Италија.
Покрај земјите домаќини, на ЕП ќе учествуваат и Словенија, Полска, Србија, Холандија, Германија, Чешка, Франција, Украина, Турција, Финска, Белгија, Португалија, Грција, Шпанија, Романија, Швајцарија, Данска, Црна Гора и Естонија. Во случај Русија да биде суспендирана, таа ќе биде заменета со Шведска врз основа на рангирањето на ЦЕВ.
ЦЕВ денеска соопшти дека Белгија, Германија, Италија и Естонија ќе бидат домаќини на Европското првенство во одбојка за жени, кое е закажано за следната година од 15 август до 3 септември. Четвртфиналето ќе се игра во Белгија и Италија. Полуфиналните натпревари и медалот ќе се играат во Белгија.
Ждрепката за двете ЕП ќе се одржи на 16 ноември во Неапол, а 24-те репрезентации ќе бидат поделени во четири групи со по шест селекции. Во осминафиналето ќе се пласираат четири екипи од секоја група.