Поранешната шкотска премиерка Никола Старџен изјави дека била шокирана и под голем стрес кога била уапсена и ослободена претходно истиот ден, додавајќи дека е невина за истрагата за финансиски малверзации на Шкотската народна партија (СНП).
„Знам дека оваа истрага е тешка за луѓето и благодарна сум што многумина продолжија да покажуваат верба во мене. Го ценам тоа, никогаш не би направила ништо за да ѝ наштетам на СНП или на земјата. Очигледно, со оглед на целиот овој процес, на можам да навлегувам во детали. Сепак, сакам да го кажам ова – јас сум невина, ништо не сум сокрила“, напиша Старџен на Твитер.
Таа додаде дека невиноста не е претпоставка и дека е должна да го почитува законот.
„Без никаков сомнеж знам дека сум невина, не сум направила ништо незаконско. Многу луѓе ми испраќаа пораки со поддршка во изминатите недели, вклучително и денес. Ви благодарам за вашата добрина. Му благодарам на моето најблиско семејство и пријателите кои ми ја даваат потребната поддршка во овој момент. Ќе ми требаат ден или два за да ги обработам најновите случувања“, додаде таа.
Старџен рече дека планира да се врати во парламентот каде што ќе продолжи да ги претставува своите гласачи во јужен Глазгов „најдобро што можам“. Таа е ослободена од притвор без обвинение во очекување на понатамошна истрага, бидејќи претходно беше уапсена.
Старџен, која поднесе оставка како прв министер и лидер на СНП на почетокот на април, е третото лице кое е уапсено како дел од операцијата Branchform, истрагата на полицијата во Шкотска за наводите дека партијата ненаменски потрошила повеќе од 600.000 фунти (700.000 евра) во донации во кампањата на независност.
Нејзиниот сопруг Питер Мурел, поранешен извршен директор на СНП, беше уапсен на 5 април во нивниот дом во Адингстон, во близина на Глазгов, и беше испрашуван 12 часа пред да биде ослободен без обвинение, пишува „Гардијан“.
Полицијата извршила претрес во нивната куќа и градина, а според налогот извршила претрес во седиштето на СНП и ги проверила документите и компјутерите.