Претседателката Гордана Сиљановска-Давкова денеска повторно говореше за новиот бугарски мандатар на влада, Румен Радев и можноста да се разговара за него за откочување на македонскиот евроинтегративен пат. Рече дека добро го познава како екс-претседател на Бугарија и кажа: „Убеденa сум дека ќе биде успешен премиер, како што беше претседател“.
Сиљановска информира дека веднаш по последните бугарски избори, го контактирала Радев преку порака, но и дека телефонски разговарале.
-Изразивме спремност за разговори. Мислам дека само тој автентично да ви одговори што можеме да направиме понатаму или со премиерот. Самото тоа што веќе имаме една стабилна влада зад која што стои огромното мнозинство на граѓаните, покажува дека има шанса навистина да разговарате со некој што е легитимен претставник на граѓаните. Со нестабилните влади, многу потешко беше тоа да се зборува, кажа шефицата на државата.
„Прогресивна Бугарија“ на Радев очекува да има редовна влада во Бугарија до средината на мај, а фокусот веднаш ќе се префрли на итни институционални и финансиски прашања, според најавите од Софија. Засега нема најави дали и кога повторно би се остварила средба со највисоките државни претставници на македонската Влада.