Полскиот премиер Доналд Туск остро ги критикуваше американските републиканци за блокирање на законот со кој би ѝ се доделил помош на Украина во износ од 60 милијарди долари.
Тој го изразил своето мислење утрово во објава на социјалните мрежи.
„Почитувани републикански американски сенатори. Роналд Реган, кој помогна на милиони од нас да ја повратиме слободата и независноста, денеска сигурно се превртува во својот гроб. Срам да ви е“, напиша Туск.
Dear Republican Senators of America. Ronald Reagan, who helped millions of us to win back our freedom and independence, must be turning in his grave today. Shame on you.
— Donald Tusk (@donaldtusk) February 8, 2024
Неочекувано силната критика на централнодесничарскиот премиер доаѓа откако американскиот Сенат го блокираше двопартиското законодавство за мерките на границата меѓу САД и Мексико и помошта за Украина од 118 милијарди долари. Законот ќе му обезбеди на Киев воена помош од 60 милијарди долари.
Туск е еден од ветераните на европската политика, откако беше премиер на Полска од 2007 до 2014 година, претседател на Европскиот совет од 2014 до 2019 година и претседател на Европската народна партија од 2019 до 2022 година, пред да се врати на премиерската функција на крајот на минатата година.