Египетскиот претседател Абдел Фатах ал-Сиси денеска најави „брутален“ одговор по нападот врз џамијата во Синај, во кој според новите сознанија, животите ги загубиле 235 луѓе.
– Оружените сили и полицијата ќе ги одмаздат нашите маченици и набргу со сила ќе ја вратат безбедноста и стабилноста – рече Сиси во телевизиското обраќање.
Египетската војска започна со воздушни напади на подрачјето на Синај, концентрирајќи се на планинското подрачје околу џамијата, каде, како што се верува, се кријат напаѓачите.
Вооружените напаѓачи упаднале во џамијата за време на молитвата на припадници на безбедносните сили. Очевидци велат дека прво се слушнала експлозија во близина на џамијата, а потоа напаѓачите, кои пристигнале со четири теренски возила, упаднале во џамијата и отвориле оган.