Премиерот Никола Груевски им го честиташе 8 Април – Меѓународниот ден на Ромите на сите припадници на ромската етничка заедница.

„На овој ден, Македонија ја обележува културната специфичност и традиции на ромската заедница, која е една од најстарите на нашата територија. Со Вашата единствена и препознатливa култура, Вие ја збогатувате разноликоста по која нашата држава е препознатлива.

Силата на нашата земја потекнува токму од нашите различности. Начинот на кој го стимулираме развојот на етничкиот, религиозниот и на јазичниот диверзитет е доказ за слободоумието и за инклузивната култура, која е белег на македонското општество. Во оваа насока и во иднина ќе продолжиме да работиме. Ќе го развиваме мултикултурализмот и активно ќе продолжиме да ги поддржуваме соживотот, соработката и хармонијата на нашето општество. Таквиот принцип на братство и на пријателство значи и дека проблемите и предизвиците со кои се соочува ромската заедница во Република Македонија не се само Ваши, тие нè засегаат сите нас.

Иднината на Македонија е иднина на Ромите и наша заедничка иднина, која можеме да ја изградиме онака како што посакуваме само преку сплотеност и заедништво, како што тоа сме го правеле и во минатото“, се вели во честитката од премиерот Груевски.