Пакетот годишни извештаи на Европската комисија за евентуалните идни членки на Унијата годинава ќе биде подготвен под нова форма и ќе претставува појасна слика за напредокот на земјите во процесот на европска интеграција, а една од новините во извештаите ќе биде оценувањето на земјите според петстепен систем, пренесе Танјуг.

Извештаите за Србија, Црна Гора, Македонија, Босна и Херцеговина, Албанија, Турција и Косово, кои неколку пати беа пролонгирани, се очекува неделава  можеби и утре , да бидат претставени во Брисел, на прес конференциија на еврокомесарот за проширување Јоханес Хан.

Во текот на последните месеци Европската комисија спроведе серија консултации зад строго затворени врати со избрани меѓународни експерти за Западен Балкан и Турција, кои препорачаа извештаите да се извадат од сувопарната бирократска форма, која досега ги правеше нечитливи. Експертите предложија извештаите да се збогатат со графикони, во нив да се воведе сврзувачки елемент преку таблици, од кои ќе се види кој колку напредувал во споредба со другите кандидати.

Освен тоа, предложено е на земјите да им се даваат оценки од еден до пет, според истиот систем што пред неколку годни се применуваше при извештаите за визна либерализација. Највисоката оценка ќе значи дека земјата целосно ги усвоила европските стандарди, а најниската ќе значи стагнација или заостанување.

Според експертите, оваа нова форма на извештаите претставува голем чекор напред затоа што со неа се намалува можноста за грешни интерпретации и политизирање на извештаите.