Бројот на заразени со коронавирус во Соединетите Држави (САД) е 104.256, најтешко е во Њујорк, каде болниците веќе немаат простор за сите пациенти.
Гувернерот на државата Њујорк, Ендру Куомо, изјави дека треба да се најдат уште четири илјади болнички кревети за пациенти со коронавирус и дека училиштата низ државата ќе останат затворени уште две недели.
„Ова ќе биде долг, тежок, грд и тажен ден“, рече Куомо во петокот пред членовите на Националната гарда кои служат во нова импровизирана болница во Конвенцискиот центар Џејкоб К. Џејвитс.
Оваа импровизирана болница е една од институциите во кои државата Њујорк ги проширува своите болнички капацитети.
Планот е тој број да се зголеми од 53.000 на 140.000 болнички кревети во државата Њујорк.
Уште неколку импровизивни болници се планира да се градат во предградијата на Њујорк, додека во пристаништето на градот треба да пристигне помош од американската морнарица до понеделник.
„Ние се стремиме да погледнеме што е можно подалеку и пошироко, да бидеме многу креативни и агресивни и да го најдеме целиот простор што може да се најде“, рече Куомо.
Тој рече дека очекува американскиот претседател Доналд Трамп да го одобри проширувањето на хотелското сместување за уште четири илјади легла во њујоршките населби Бронкс, Бруклин, Квинс и Островот Статен.
Државата Њујорк досега хоспитализираше повеќе од шест илјади пациенти со КОВИД-19, од кои скоро 1,6 илјади се на интензивна нега.
Њујорк има најголем број смртни случаи во сите држави.
Куомо исто така им нареди на сите училишта во Њујорк да останат затворени до 15 април, додека пред две недели беше решено да се затворат до 1 април.
Училиштата во самиот град Њујорк ќе бидат затворени до 20 април, иако официјалните лица споменуваат дека може да останат затворени до следната учебна година.