За прв пат работевме на начин, како што партија треба да работи, по петти пат по ред победивме на парламентарни избори, изјави лидерот на ГЕРБ Бојко Борисов во видео емитување на неговиот Фејсбук профил по завршувањето на денот на изборите.
„Ако имате 5% или 9% и зборувате во име на народот, тоа е смешно. За мене е најдобро да има што повеќе застапеност во парламентот“, нагласи Борисов.
„Доаѓаат најважните месеци од оваа година, Бугарија може да изгледа уште подобро и да се промени. Знам за што зборувам и каква одговорност имам. Многу ми е драго што толку многу партии влегуваат во парламентот затоа што ми е преку глава сам да носам одговорност. Наместо да се расправаме кој е поголем, да видиме дали следните 8 месеци од годината можеме да се консолидираме, бидејќи светот нè гледа, Европа нè гледа. Ако немаме стабилна политичка ситуација, бидете сигурни дека ништо нема да излезе како што треба“, рече Борисов, посочувајќи ги фондовите на ЕУ и Зелениот договор.
„Радувајте се, веќе сте во парламент, станувате пратеници. Нели тоа го сакавте? Јас ви нудам мир, да ги собереме експертите и до декември со максимална сила, да излеземе од пандемијата и да тргнеме напред. Ова е мој предлог до сите. Ајде да го избереме најдоброто што може за да ја заврши работата. На крајот на краиштата, заедништвото ја прави силата“, рече Бојко Борисов во изјавата дадена од дворот на неговата куќа пред црниот џип.