Возачите во Велика Британија кои ќе усмртат некого со возило би можеле да добијат доживотен затвор, врз основа на измената на Законот за полиција, криминал, казни и судови што стапува на сила во вторник.
Според Би-Би-Си, според изменетиот закон, судиите ќе можат да изречат доживотни казни за опасните возачи кои усмртиле некого во сообраќајот и возачите кои тоа го сториле под дејство на дрога и алкохол. Максималната казна за оние кои ќе предизвикаат сообраќајна несреќа во моментов е 14 години.
„Одговорните сега ќе се соочат со можноста да живеат зад решетки“, изјави британскиот министер за правда Домини Раб.
Со новиот закон се воведува и ново кривично дело нанесување тешки телесни повреди со несовесно возење. Тоа значи дека возачите кои некому ќе нанесат долготрајни или трајни повреди ќе бидат казнети и со построги казни. Предложената измена на законот првпат беше објавена во 2017 година.
Зголемувањето на висината на казните ќе се однесува на прекршоци во Англија, Шкотска и Велс, но не и во Северна Ирска, која има посебни закони за безбедност на патиштата.
„Премногу животи се изгубени поради несовесно однесување зад воланот… Семејства се уништени“, додаде министерот Раб.