Министерот за надворешни работи на Србија, Ивица Дачиќ, денеска беше прашан за најавата на Приштина дека ќе поднесе барање за членство на Косово во ЕУ, и рече дека за тоа е потребен консензус „кој го нема во ЕУ“ бидејќи смета дека тоа е политичко-маркетиншки потег за внатрешно-политичка употреба на Косово.
„Пред само еден месец реков дека имаме информации дека Приштина ќе поднесе апликација за членство во ЕУ. Сметаме дека таков потег двојно не е добар. Прво, затоа што е јасно дека нема единствен став во однос на статусот на Косово, односно дека пет земји не го признаваат Косово и дека досега не е евидентирано дека некој добил статус на кандидат за членство, а прашањето за статусот не е решено и второ затоа што во услови на апсолутно непочитување на сите договори од страна на Приштина, невозможно е некој да размислува за тоа“, рече Дачиќ.
Дачиќ додаде дека е речиси невозможно некој да го прифати тоа во овие услови кога, како што вели, јасно е дека однесувањето на Албин Курти е еден од главните дестабилизирачки фактори во регионот.