Британскиот премиер Борис Џонсон оствари средби со германската канцеларка Ангела Меркел и францускиот претседател Емануел Макрон на маргините на самитот на Г7, бидејќи турбуленциите по Брегзит ги влошуваат односите меѓу Велика Британија и ЕУ.
Џонсон, исто така, се состана со лидерите на блокот, претседателката на Европската комисија Урсула фон дер Лајен и претседателот на Европскиот совет, Чарлс Мишел, во саботата во одморалиштето во заливот Карбис каде се собираат водачите на Г-7, објави АП.
Велика Британија и ЕУ се во затегнати односи во врска со ескалираниот дипломатски спор околу Северна Ирска, единствениот дел од Велика Британија што има копнена граница со блокот. ЕУ е бесна од доцнењето на Велика Британија во спроведувањето нови проверки на некои стоки што доаѓаат во Северна Ирска од остатокот на Велика Британија, додека Велика Британија вели дека проверките наметнуваат голем товар на фирмите и го дестабилизираат тешко постигнатиот мир со Северна Ирска.
ЕУ се заканува со правна постапка доколку Велика Британија не воведе целосни проверки, кои вклучуваат забрана за увоз на месо како што се колбаси од Англија, Шкотска и Велс, кои одат во Северна Ирска следниот месец.
Велика Британија го обвинува блокот за „пуристички“ пристап кон правилата и ги повика да бидат пофлексибилни.