Анкара ќе продолжи да врши притисок врз Израел преку трговија и дипломатија се додека администрацијата на Нетанјаху не стави крај на масакрот во Појасот Газа, изјавил во саботата турскиот претседател Реџеп Таип Ердоган.
Говорејќи на состанокот на Одборот за надворешни економски односи (DEIK) во Истанбул, Ердоган бил недвосмислен во својот став за она што се случува во Газа од 7 октомври 2023 година.
„Ги одржуваме нашите канали за комуникација отворени во нашата деловна заедница во процесот на спроведување на нашата одлука за суспендирање на комерцијалните трансакции со цел да го принудиме Израел, кој уби 36.000 невини луѓе во Газа, да прекине со огнот“, рекол Ердоган, додавајќи:
„Анкара ќе продолжи да врши притисок врз Израел преку трговија и дипломатија се додека администрацијата на Нетанјаху не стави крај на масакрите во Газа“.
Во петокот, Меѓународниот суд на правдата ги потврди своите претходни наредби и укажа на дополнителни мерки, вклучително и одржување на граничниот премин Рафах отворен и дозволување на истражителите пристап до блокираната енклава.
Повеќе од 35.900 Палестинци се убиени во Газа, од кои огромно мнозинство се жени и деца, а речиси 80.300 други се ранети од октомври по нападите на Хамас. По повеќе од седум месеци израелски напади, големи делови од Газа се во урнатини во услови на блокади на храна, чиста вода и лекови.
Говорејќи за економската ситуација во неговата земја, Ердоган порачал дека економскиот приоритет на Турција е да ја намали инфлацијата на едноцифрени бројки за трајно олеснување, со фокус на долгорочна стабилност за подобрување на благосостојбата на нацијата.
„Од втората половина на годината влегуваме во период на дезинфлација. Нема да дозволиме дополнителен инфлациски притисок преку фискалната политика“, кажал Ердоган.