Турскиот претседател Реџеп Таип Ердоган денес изјави дека е многу важно да се воспостави стабилност во Авганистан, велејќи дека неговата земја не може да се справи со дополнителниот товар на миграцијата од Сирија или Авганистан.
„Воспоставувањето стабилност во Авганистан е многу важно, така што Турција ќе продолжи со блискиот дијалог со сите страни во таа земја“, рече тој за време на вечера за амбасадорите во турскиот град Битлис.
„Засега на пораките кои доаѓаат од талибанските лидери им пристапуваме со претпазлив оптимизам“, рече турскиот претседател.
„Бараме од Талибанците дела, а не зборови“
Тој нагласи дека следните чекори на Талибанците ќе ја одредат иднината на Авганистан.
„Дејствата на Талибанците, а не зборовите, ќе одредат како ќе се одвива претстојниот процес во Авганистан“, додаде тој.
Ердоган рече дека неговата земја повеќе не може да се справи со дополнителната миграција.
„Турција, која досега прими повеќе од пет милиони баратели на азил со различен статус, не може да се справи со дополнителниот товар на миграцијата од Сирија или Авганистан“, рече турскиот претседател.