Европската унија повторно ги продолжи санкциите од економскиот сектор против Русија за шест месеци, се наведува во соопштението на Советот на ЕУ.
„Советот на ЕУ денес донесе одлука за продолжување на санкциите насочени кон специфични економски сектори на Русија за шест месеци, до јануари 2021 година“, се наведува во соопштението.
Првично, Европската унија воведе санкции против Русија на 31 јули 2014 година за една година. Во март 2015 година, рокот за укинување на санкциите беше поврзан со „целосната имплементација на договорите од Минск“. Од тој момент, санкциите се продолжуваат на секои шест месеци, шест години по ред.
Мински договори
На 12 февруари 2015 година во Минск се водеа преговори меѓу лидерите на земјите од „нормандиската четворка“. Договорите од Минск за решавање на ситуацијата во источна Украина предвидуваат прекин на огнот, повлекување на тешкото вооружување од контактната линија и уставни реформи, чии клучни елементи треба да бидат децентрализацијата и усвојување на закон за посебниот статус на Донбас.
Планот сè уште не е исполнет, бидејќи украинските политичари постојано го одложуваат неговото спроведување, па дури наведуваат дека тој има само советодавен карактер, а не обврзувачки. Ставот на Русија е дека нема алтернатива на договорите од Минск.