Неучеството во техничката влада, за ВМРО-ДПМНЕ може да биде само алиби за изборниот пораз, изјави денеска портпаролот на СДСМ и пратеник Дарко Каевски. Тој одговарајќи на новинарско прашање истакна дека „деструктивните политики на ДПМНЕ, блокадите, обидите да се закочи земјата, да се блокира Собранието, ги гледаме со години нананзад“.
-ДПМНЕ друго и не знае, бидејќи нема понуда за граѓаните. Не се нешто ново обиди за создавање криза, зборував и во пресот за нив. Како што досега не усепа така нема ниту овој пат. Нема да најде алиби, Мицкоски го чека двоен пораз на изборите, тој го знае тоа многу добро, рече Каевски на прес-конференција во седиштето на СДСМ.
Портпаролот на ВМРО-ДПМНЕ, Наум Стоилковски вчера порача дека неговата партија допрво ќе донесе одлука дали ќе учествува и евентуално со кои имиња во техничката влада.
На новинарско прашање „Дали би го гласале Јован Митревски за претседател на Собранието“, Стоилковски рече дека тоа не важно во моментов.
-Тоа е не битно во моментот, важно е дека Талат Џафери по избор на Мала Речица и со една уцена од ДУИ кон СДС ќе биде премиер во следниот период без никаков легитимитет, истакна портпаролот на најголемата опозициска партија.
ДУИ пред два дена на состанок во Мала Речица го предложи Талат Џафери за технички премиер на преодната влада од 28-ми јануари до изборите напролет. Интегративците го овластија претседателот на партијата Ахмети да ги продолжи разговорите со политичките партии за евентуални коалиции за претседателските и парламентарните избори.