Норвешката ѕвезда Ерлинг Халанд го обвини шведскиот дефанзивец Александар Милошевиќ дека го навредувал за време на натпреварот меѓу двете селекции од Лигата на нации. Норвешка победи со 2-1 на гости со двата гола на Халанд, а на крајот од мечот за Швеѓаните прецизен беше напаѓачот на Манчестер Јунајтед, Ентони Еланга.
„Прво ми кажа дека сум ку*ва, што можам слободно да кажам дека не сум. Потоа ми рече дека ќе ми ги скрши нозете. Минута и пол подоцна постигнав гол. Добро испадна“, изјави Халанд за ТВ2 Норвешка по натпреварот.
Новото засилување на Манчестер Сити го прослави вториот гол на „Френдс арената“ пред Милошевиќ и им порача на шведските навивачи да молчат.
Сепак, Милошевиќ ја демантираше верзијата на Халанд.
„Јас не го кажав тоа. Непристојно е од негова страна да го каже тоа, бидејќи јас не зборувам норвешки, а тој не зборува шведски, па не знам како комунициравме. Не зборувам англиски на теренот, па чудно е што рече дека сум кажал работи што не сум ги кажал“, изјави дефанзивецот и додаде дека немало тензија меѓу двајцата.
„Тоа може да се случи. Сум играл на натпревари каде што сум бил многу полут“, изјави Милошевиќ.
21-годишниот Ерлинг Халанд веќе има 18 гола на 19 натпревари за норвешката репрезентација.