На изборите за Европскиот парламент следната година, изберете проевропски политичари кои ќе ја водат Хрватска напред, им порача на хрватските гласачи претседателката на ЕП, Роберта Мецола пред нејзината посета на Загреб.
Мецола доаѓа во Хрватска во прва официјална посета како претседател на Европскиот парламент (ЕП) на 19 и 20 јуни на покана на претседателот на Парламентот Гордан Јандроковиќ.
„Мојата посета доаѓа во време кога навистина можеме да ги славиме достигнувањата на Хрватска откако стана членка на ЕУ. Фантастични одлуки оваа година за влез во Шенген зоната и во еврозоната. Затоа, мојата порака ќе биде: бидете горди на достигнувањата на вашата земја. “, рече Мецола во интервју за „Хина“.
Таа во понеделник ќе разговара со премиерот Андреј Пленковиќ, ќе учествува на конференција за десетгодишнината од членството на Хрватска во ЕУ и ќе разговара со младите. Во вторник таа ќе се сретне со Јандроковиќ и ќе разговара со пратениците.
„Хрватска е во срцето на Европската унија. Можете да го видите и почувствувате опипливиот ефект и трансформацискиот ефект од членството во ЕУ, а тоа треба да ве наведе да гласате со задоволство на европските избори следната година. Пополнете ги хрватските места во Европскиот парламент со проевропски политичари кои навистина сакаат да ја турнат својата земја напред“, рече таа.
Минатата недела, една година пред европските избори на 6 и 9 јуни 2024 година, Европскиот парламент ги објави резултатите од пролетниот Евробарометар, кои покажуваат зголемен интерес и свесност кај граѓаните за овие избори.
Подготвеноста за гласање, сепак, варира низ Европа. Интересот за избори е зголемен кај западните членки, но сепак е значително помал кај источните членки на Унијата.
„Ќе треба да видиме што ќе се случи следната година, но сигурно е дека овие пет години создадоа поголем интерес и резултатите од Евробарометар можеби се должат на тоа што бевме неверојатно уникатни. Воспоставивме, на пример, механизми за закрепнување и издржливост дури и без ЕУ тешко би ја надминале пандемијата“, вели Мецола.