Денес германската канцеларка Ангела Меркел го повтори своето противење на укинувањето на заштитата на интелектуалната сопственост за вакцините за коронавирус и ги повика САД да го отворат „пазарот“ и да дозволат извоз на вакцини и нивни состојки.
„Се надевам дека сега кога голем дел од американското население е вакцинирано, можеме да имаме слободна размена на состојки и исто така отворање на пазарот на вакцини“, рече германската канцеларка на крајот од неофицијалниот самит на европските лидери.
Францускиот претседател Емануел Макрон исто така денеска ги повика „англосаксонците“ да престанат да го „блокираат“ извозот на вакцини.
Тој посочи дека од 110 милиони дози на вакцини произведени во Европа, ЕУ извезува 45 милиони и чува 65 милиони, додека во исто време, 100 проценти од вакцините произведени во Соединетите држави отишле на американскиот пазар.
Меркел повтори дека е против укинување на заштитата на патентите за вакцината против вакцините, како што предлага администрацијата на американскиот претседател Џо Бајден.
Германската канцеларка рече дека не смета дека тоа ќе биде решение што ќе им овозможи на вакцините да бидат подостапни за поголем број луѓе.
„Мислам дека е потребна креативност и иновативност на компаниите, а тоа вклучува и патенти“, додаде Меркел.
Денес, папата Франциск го поддржа предлогот за укинување на правото на патент за вакцини против Ковид-19 со цел да се забрза дистрибуцијата на вакцините во сиромашните земји.