Тренерот на Рома, Жозе Мурињо ги остави навивачите на тимот да се прашуваат дали спринтерот Ламонт Марсел Џејкобс ќе стане фудбалер од светска класа.
Португалскиот стручњак покажа фотографија со олимпискиот шампион на 100 метри и изрази уверување дека спортистот одлично ќе се вклопи во шемата на Рома.
„Супер брз, доминантен, технички совршен. Може да игра како дефанзивец или напаѓач…“ напиша Мурињо во објавата на социјалните мрежи покрај фотографијата на 27-годишниот, еден ден по победата на Рома од 5:0 над Шахтјор Доњецк на претставувањето на тимот пред новата сезона во Серија „А“.
Џејкобс е навивач на Рома и го доби дресот со број 12 за време на неговата посета на римскиот клуб. Спринтерот треба да се откаже од атлетиката за да биде следното големо засилување на Рома ова лето, откако аргентинскиот напаѓач Пауло Дибала му се приклучи на клубот во јули.
„Можам да играм каде сакаш тренеру“, му одговори во коментар на португалскиот тренер и ја сподели објавата на сопствениот профил.