Секторот за компјутерски криминал во МВР го документира случајот со говор на омраза кај реисот Сулејман Реџепи. Откако вчера Хелсиншки комитет поднесе кривична за ширење говор на омраза и излагање на подбив на македонскиот народ, полицијата „ги засука ракавите“. Се анализира дали неговиот говор кога дава квалификации на „див“ и „непримерен народ без идентитет“, јавува 24 Вести.
– „Министерството за внатрешни постапува по поднесената пријава од страна на Хелсиншкиот комитет , случајот се документира и во текот на денот ќе биде известено јавното обвинителство.“ – велат од МВР.
Осуда за говор на омраза пристигна и од „Илинденска бр.2. „ Вчера Комисијата за односи со верските заедници порача дека ваквите говори кои предизвикуваат и понатаму ширење на нетрпеливост и омраза се минато.
– „Владата го осудува секој говор на омраза, без разлика дали е искажан на социјални медиуми, на трибини или каде било.“ – изјави Миле Бошњаковски- портпарол на Влада.
За разлика од оваа општа изјава на владиниот портпарол, потпретседателот на СДСМ и пратеник Мухамед Зекири упати сериозни критики до реисот Реџепи.
– „Резил улема Сулејман Реџепи позицијата поглавар на ИВЗ ја има узурпирано со Калашникови, со закани и сеење страв. Повеќе од 10 години трае неговото самоволие во таа институција. Иако е најповикан да постапува во склад со тоа на што нè учи ИСЛАМОТ, имено да биде праведен и да ги почитува различностите, тој го прави токму спротивното“. – изјави Мухамед Зекири.
Од ИВЗ вчера порачаа дека реисот бил изваден од контекст бидејќи кога рекол тоа е див и непримерен народ без идентитет не кажал „македонци“, и мислел на жителите во Лажец. Инаку ова село демографски важи за мешано македонско-албанско село. Реџепи пред десетина дена се скара и со премиерот и со преписки даде ултиматум дека предизборно ќе ги извести верниците во 700 џамии дека се дискриминирани. Но, по неколку дена се повлече и најави дека решавањето на спорените верски објекти ќе го бара по изборите.