Веќе знаеме дека будењето подоцна за време на викендите или избегнувањето на вештачки засладувачи може да го намали ризикот од срцев удар, а замрзнатиот зелен зеленчук помага во регулирањето на шеќерот во крвта. Но, експертите тврдат дека една шолја топло какао може да ги донесе истите придобивки. Клучот е да се користи незасладено, чисто какао, кое е богато со флаваноли – моќни антиоксиданси кои се наоѓаат и во овошјето и во зеленчукот.
Флаванолите, како што објаснува диететичарот Софи Ловер, можат да ја забават апсорпцијата на јаглехидратите, да ја подобрат чувствителноста на инсулин и да ги зачуваат бета-клетките во панкреасот.
„Студии покажуваат дека какаото може да помогне во одржувањето на панкреасот здрав и да го регулира инсулинот, што може да го одложи или спречи почетокот на дијабетес тип 2“, изјави таа за „Parade“.
Нутриционистката Кетрин Жервасио додава дека флаванолите го подобруваат протокот на крв, го намалуваат воспалението и го намалуваат крвниот притисок, а со тоа го намалуваат обемот на работа на срцето и ризикот од срцев удар.
Ловер нагласува дека многу комерцијални производи од топло какао содржат ниски нивоа на флаваноли, па затоа најдобар избор е пијалокот да го подготвите дома. За подготовка на какао препорачува и темно чоколадо бидејќи има поголема концентрација на флаваноли.
Сепак, ниту една храна сама по себе не го намалува ризикот од дијабетес и срцев удар, а умереноста е исто така многу важна.
„Најдобри резултати се постигнуваат преку комбинација на разновидна исхрана, редовна физичка активност, квалитетен сон и управување со стресот. Сите овие навики работат заедно за да го заштитат вашето срце и да помогнат во спречување на дијабетес”, заклучил Жервасио.