Папата Франциск ги повика раководителите на светските финансиски институции да го намалат должничкиот товар на сиромашните земји погодени од пандемијата на коронавирус и да им дадат поголема улога во донесувањето глобални одлуки.
Во писмото до учесниците на пролетниот состанок на Меѓународниот монетарен фонд (ММФ) и Светска банка, Папата напиша дека пандемијата го принудила светот да се помири со меѓусебната поврзана, социо-економска, еколошка и политичка криза.
„Поимот закрепнување не може да значи враќање кон нееднаков и неодржлив модел на економски и социјален живот, каде мало малцинство од светското население поседува половина од богатството“, рече Папата во писмото на 4 април.
Тој повика на нов „глобален план“ што „неизбежно значи да им се даде на посиромашните и помалку развиените земји ефективна улога во донесувањето одлуки и олеснување на нивниот пристап до меѓународниот пазар“.
Додаде дека духот на глобалната солидарност „бара барем значително намалување на должничкиот товар кон најсиромашните нации, што е влошен од пандемијата“.
Шефовите за финансии на 20-те најголеми економии во средата го продолжија суспендирањето на трошоците за сервисирање на долгови кон земјите во развој, но не успеаја да го откажат долгот или да го ублажат на барање на непрофитните организации.
Финансиските пазари мора да бидат регулирани со закони и регулативи кои ќе обезбедат тие да функционираат за општо добро, рече папата Франциск, повикувајќи се на „праведно финансирана солидарност со вакцините“.
„Не смееме да дозволиме законот на пазарот да има предност пред законот на љубовта и здравјето за сите нас“, рече Папата.
Кампањите за вакцинација во сиромашните африкански земји заостануваат далеку зад богатиот свет, особено од Соединетите држави и Велика Британија, па Папата Франциск ги повика политичките и деловните лидери да обезбедат „вакцини за сите, особено за најранливите и најсиромашните“.