Изјавата на министерот за внатрешни работи на Србија, Александар Вулин, дека тој се залага поседувањето на т.н. „Скај“ и слични апликации да биде кривично дело, сè уште нема добиено официјален предлог, ниту проценка за тоа колку оваа мерка ќе придонесе во борбата против организираниот криминал.
„Скај“ телефоните станаа предмет на изјави на официјални лица во Србија по апсењето на Вељко Беливук и членови на неговата група, осомничени за најтешки злосторства.
Како што објаснија највисоките претставници на државата, членовите на таа група користеле телефони „Скај“ за меѓусебни договори и размена на материјали, по што министерот за полиција оценил дека поседувањето такви телефони треба да се казни со закон.
„Би било како да гаснете голем пожар со кофа вода“, изјави за радио Слободна Европа (РСЕ) криминологот Душан Давидовиќ, од белградската невладина организација Центар за спречување на криминал.
Тој смета дека елитните единици во српската полиција, кои директно апсат припадници на најголемите криминални групи, имаат современо оружје и друга опрема, но дека прво треба подобро да бидат опремени со информативни и технолошки средства, особено затоа што највлијателните криминалци користат најмодерни уреди.
„Тие имаат неограничена сума пари од нивните незаконски активности, од кражба, преку рекет, до перење пари. Затоа тие честопати се чекор понапред од полицијата затоа што имаат најсовремени технолошки производи што ги злоупотребуваат“, вели Давидовиќ .
Што е „Скај“ телефон?
Според веб-страницата „SKY ECC“, станува збор за безбедна апликација за безбедно испраќање пораки што работи на безбедни уреди.
„SKY ECC“ е инсталиран само на уреди кои не можат да бидат хакирани, оние кои имаат чипови отпорни на хакерски напади и кои се во согласност со нашите најстроги стандарди“, се вели, меѓу другото, на нивната веб-страница.
Исто така, нагласува дека апликацијата „SKY ECC“ работи на приватна глобална мрежа на сервери, дека пораките се шифрираат преку нивниот систем, дека компанијата не може да ги чита или складира и дека уредите „SKY ECC“ ги оневозможуваат функциите што претставуваат ризик за приватноста и безбедноста.
Компанијата, исто така, ги опишува придобивките од својот производ преку тројно шифрирање, приватни клучеви за пристап до уредот, безбедни гласовни белешки, можност за поставување пораки за самоуништување и далечинско бришење на содржината на уредот и апликацијата „Скај“.
Пошироката јавност слушна за „Скај“ и слични високо заштитени апликации за комуникација на крајот на февруари, кога претседателот на Србија, Александар Вучиќ, објави дека ќе бидат објавени фотографии од најтешките кривични дела на споменатата група.
Ова беше направено во директен пренос на телевизија со национална фреквенција, прикажувајќи три фотографии од безживотно тело на човек и отсечена глава. Вучиќ тогаш рече дека дел од доказите во истрагата се добиени од содржината на телефоните што имаат посебен заштитен систем, наречен „Скај“.