Евидентирани вкупно 57 случаи на голема кашлица сезонава во Скопје. Од Центарот за јавно здравје информираат дека засега нема регистрирано мали сипаници и овие податоци се заклучно со 22 февруари.
Во меѓувреме се зголемува интересот за вакцинација против пертусис, народски позната како голема или магарешка кашлица. Од 18-ти јануари до 14-ти февруари се вакцинирани над 13 илјади деца, што е солиден одзив според Комисијата за заразни болести и релативно се задоволни, но потенцираат дека работата не е завршена бидејќи има илјадници деца кои требало да се вакцинираат.
Во однос на тоа дали возрасните треба да се ревакцинираат, претседателот на КЗБ, д-р Александар Петличковски пред два дена рече дека болеста пертусис за возрасни луѓе не е тешка болест, за неа има достапен лек и нема потреба од страв.
Додаде дека вакцините обезбедуваат имунитет што трае меѓу пет и десет години и е многу солиден, и поентата на вакцинирањето е да се преброди критичниот период на возраст за оваа болест.
Според Петличковски, заразноста не е долга и трае неколку дена, а инкубацискиот период може да се движи од 7 до 21 ден.