Не се работи за безправна сеча на дрва на планината Беласица, бидејќи на тој дел имаме најмалку безправни сечи, велат за „Локално“, од Шумско полициска станица-Струмица, во врска со протестот на жителите од с.Колешино за неконтролираната сеча на огревни дрва на планината Беласица.
– Таму граѓаните мислат дека ЈП Национални шуми, односно Беласица – Струмица врши прекумерна сеча затоа што на тој дел шумско стопанство „Беласица“ покрај режиска сеча имаат дадено и сеча на физички лица за сопствени потреби. Граѓаните во тој дел гледаат како се движат 10 до 20 возила натоварени со огревни дрва и мислат дека тоа е безправно, а не дека тие се легални сечи. Мислиме дека во врска со тој проблем треба да се произнесе инспекторатот за Шумарство, бидејќи тие редовно вршат контрола како во шумско стопански основи, така и на терен, па мислиме дека тие треба да се произнесат за настанатиот проблем, а од наша страна редовно на тој дел се врши контрола и ќе продолжиме и понатаму да вршиме контроли, велат од Шумско полициска станица-Струмица.
Од Државен инспекторат за шумарство и ловство не добивме повратни информации за случајот.
Од Шумско полициска станица-Струмица, информираат дека минатата година до Основен суд Струмица имаат поднесено 58 барања за поведување за прекршочна постапка, а има изречено 42 пресуди со правосилна одлука.
– Во 2021 година, Шумско полициска станица-Струмица има евидентирано посечена дрвна маса од безправни сечи од 80 м3 и тоа претежно на реонот Палазлија, Попчево, планината Плавуш и с.Велуса, односно планината Еленица и други реони, но овие реони се најударни. Од таа дрвна маса шумската полиција има одземено 50 м3 и е предадено на ЈП Национални Шуми. Иста така минатата година имаме одземено 35 патнички моторни возила, товарни моторни возила и запреги, информираат од шумската полиција Струмица.
Казните според законот за шуми за физички лица се движи од 3.500 евра до 4000 евра. Поради неусогласеноста на законот на шумите и законот за прекршочни последици во последната година се суди по закон за прекршоци и казните се движат од 100 до 300 евра.
M.A.