„Власта ги претвори судовите и обвинителствата дом за згрижување на семејствата на функционерите“, се вели во соопштение на ВМРО-ДПМНЕ.
Според нив „Талат Џафери е на чело на Законодавниот дом, и прв во законодавната власт, а неговиот син Барлет Џафери станува нов јавен обвинител, шеф ќе му биде кадарот од ДУИ Исалм Абази, чија сопруга исто така станува јавен обвинител“.
„Нов обвинител е и ќерката на обвинителката за организиран криминал Гордана Смаќоска, Билјана Смаќоска, а нов судија Драган Јосифовски, син на обвинителката од СЈО, Елизабета Јосифовска“, велат од опозициската партија.
Од ВМРО-ДПМНЕ додаваат „нови обвинители ќе бидат и синот на судијата Енвер Беџети, Јетмир Беџети, како и синот на судијата во Вишиот Управен суд Субхи Јакупи, Илир Јакупи“.
„Која правда може да ја очекува народот, кога правосудството има метастаза од непотизам? Потребни се коренити промени и мерит систем, каде ќе се вреднува квалитетот“, пишува во соопштението на ВМРО-ДПМНЕ.