Повременото или испрекинатото постење (intermittent fasting) е начин на исхрана кој е многу популарен меѓу ѕвездите во светот, а нејзини поборници се и Никол Кидман и Хју Џекмен.
За разлика од другите режими, овој го ограничува времето на внес на храна, но ова не значи дека треба во дозволениот период да претерувате со калориите. Основната верзија е ограничување на внес на храна во текот на 12 до 16 часа. Доброто во тоа е што можете да „натемпирате“ за голем дел од ова време всушност, да го спиете, а во остатокот да ги распоредите оброците.
Секако, во дозволениот период можете да броите калории или да внимавате што внесувате, но акцентот не е на тоа, туку на постењето, односно дозволување на телото да ја преработи внесената храна без да го дополнувате со грицки, десерти или некој непотребен оброк само поради стрвост.
Со ваквиот начин на исхрана вие воспоставувате здрав ритам и му помагате на својот метаболизам. Ова се основните типови на повремено постење, а и како всушност се изведуваат во пракса:
16/8
Постењето трае 16 часа, а во тек на 8 часа распоредувате три оброци. Според некои диетолози, жените треба да практикуваат 14/10 верзија, но тоа сепак зависи од личниот избор. Во текот на постењето е дозволено да пиете кафе, вода и чај, по можност да не додавате шеќер.
Наизменични денови
Секој втор ден применувате рестрикција на калории. На пример, ако почнувате во понеделник, тој ден е дозволено да внесете 2000-2200 калории за жени и до 2500 за мажи. Следниот ден внесувате една петтина од вообичаениот внес на калории.
24-часовен пост
Идејата е во текот на неделата да имате еден до два дена во кои 24 часа постите и внесувате само течности, а во останатите денови се храните вообичаено. Во построгите верзии на оваа верзија, при постот се дозволени само вода, чај, кафе и бистар сок од јаболко со низок процент на шеќер. Во помалку строгата верзија може да се пие и млеко и јогурт, најмногу по една чаша во денот.
Војничка верзија
Во оваа строга варијанта на повремениот пост во тек на 20 часа внесувате овошје или зеленчук, а во 4 часа, распоредени во попладнето, треба да имате два богати оброка. На пример, оброците можете да ги сместите во периодот меѓу 15 и 19 часот или 16 и 20 часот, за да има време телото да ја вари храната додека сте будни.
5:2 дена
Два дена во неделата треба да внесувате една четвртина од вообичаениот внес на калории, а во остатокот да јадете нормално. Двата дена, за разлика од 24-часовниот пост, треба да бидат последователни, односно не можете да изберете да бидат на пример, вторник и петок.
Како оваа диета делува?
Повременото постење ве поврзува со биолошкото чувство на глад, а не со емоционалното. Ви помага да направите разлика меѓу задоволство од храна и чувство на ситост и ве учи како да ги прескокнете калоричните ужинки.
Практични совети:
– Изберете го планот кој е идеален за вас
– Обидете се да не јадете по 21 часот (или адаптирајте соодветно, доколку работите втора или ноќна смена)
– Однапред планирајте го менито
– Внимавајте на големината на порциите
– Внесувајте доволно вода
– Намалете го внесот на грицки и десерти
Најдобри ефекти постењето има во комбинација со здравата храна, но најдобро е прво да ја стекнете навиката на постење, а потоа да комбинирате здрави намирници во оброците.