Повеќе луѓе би можеле да умрат од болести отколку од бомбардирањето во Појасот Газа, доколку здравствениот систем не се опорави, изјави денеска портпаролката на Светската здравствена организација (СЗО).
Здравствените власти во Газа, кои ОН ги сметаат за сигурни, велат дека повеќе од 15.000 луѓе се убиени во израелските напади, од кои околу 40 отсто се деца, а се стравува дека многу повеќе се мртви под урнатините.
Израел е цврст во намерата да го уништи Хамас, милитантната група која владее со Газа, откако нејзините вооружени лица влегоа во Израел на 7 октомври, убивајќи околу 1.200 луѓе и заробувајќи 240 од нив.
„Ќе завршиме со повеќе смртни случаи од болести отколку од бомбардирања ако не успееме (заедно) да ги закрпиме дупките во овој здравствен систем“, рече Маргарет Харис од СЗО на прес-конференција во ОН во Женева.
Ја повтори својата загриженост за зголемувањето на појавата на заразни болести, особено дијареа. Цитирајќи го извештајот на ОН за условите за живот на раселените жители во северниот дел на Појасот Газа, таа рече: „Нема лекови, нема вакцини, нема пристап до чиста вода или хигиена и нема храна. Има многу голем број на доенчиња со дијареа“.
Харис го нарече „трагедија“ уништувањето на болницата „Ал Шифа“ во северниот дел на Газа и изрази загриженост за дел од медицинскиот персонал што го задржаа израелските сили во конвојот за евакуација на СЗО. Џејмс Елдер, портпарол на Детската агенција на ОН во Газа, на новинарите преку видео им рече дека болниците во Газа се полни со деца со воени рани и чир на желудникот од пиење контаминирана вода.
„Запознав многу родители… Тие точно знаат што им треба на нивните деца. Немаат пристап до чиста вода и тоа ги уништува“, рече тој.
Раскажа како видел дете без дел од ногата како лежи на подот на болницата неколку часа без да му се помогне поради недостиг на медицински персонал.