Невидена трагедија се случи во основното училиште „Владислав Рибникар“ во Белград. Во средата наутро, седмоодделенец од тоа училиште, Коста К., убил осум соученици од 7/2 одделение и еден училишен чувар, а тешко повредил уште шест ученици и еден наставник по историја.
Момчето дошло на училиште вооружено со два пиштоли и три шаржери полни со 15 куршуми и четири молотови коктели. Тој имал однапред сработено сценарио и список на сите што имал намера да ги убие. За жал, тој успеа да реализира голем, преголем дел од својот план со масакр што не се памети не во Белград или Србија, туку во овој дел од Европа.
– Ова е огромна трагедија која предизвикува тага и болка – изјави Веселин Милиќ, началник на белградската полиција, кој на вонредна прес-конференција ја претстави хронологијата на страшното злосторство.
-Околу 08:40 часот во полиција се јавила Иванка Јовановиќ која пријавила дека во училиштето влегло дете и дека се пукало. Потоа се јавил Коста К. и рекол дека пукал во неколку лица. Во оваа прилика загинаа осум ученици, седум девојчиња и едно момче. Во истиот инцидент повредени се шест ученици, четири момчиња и две девојчиња. Поминаа 25 години откако почнав да работам, бев на илјадници инспекции, но ова е невидено во целото општество. Ова е прашање за целиот систем. Полицајците го лишиле од слобода Коста К. На местото на настанот е пронајдено оружје. Ова било планирано и организирано, злосторството го планирал еден месец. Мотивот се уште не е утврден. Од станот на татко му одзел два пиштола. Подготвил и четири молотови коктели – рече Милиќ, а потоа ги покажал фотографиите кои биле пронајдени кај уапсеното момче.
– Ова беше список на деца кои планираше да ги ликвидира. Тој ги нацртал и влезот и излезот од училиштето и, како што рече, ги одредил приоритетните цели. Скицатс личи на нешто од видео игра и хорор филм, што укажува на тоа дека во која училница детално планирал како да влезе – изјави Милиќ.
– Влезе во училиштето и веднаш го застрелал чуварот, а потоа се упати кон училницата по историја, која е најблиску до влезната врата и тоа беше причината што го избра токму овој ден да го спроведе својот план. По пат го сменил шаржерот и кога влегол во класот прво пукал во наставничката, а потоа и во децата. После тоа излегол во дворот и повикал полиција и пријавил што направил, а набрзо бил уапсен. Ништо не кажа за причините зошто го направил тоа – ги раскажа Милиќ за драматичните моменти од масакрот.
Според српските медиуми, сторителот се уште нема 14 години, што значи дека не може кривично да одговара за ова дело. Многумина се прашуваат дали и тоа било дел од неговиот план, со оглед на тоа што тој нема да наполни 14 години до 30 јули. Извори од полицијата, пак, наведуваат дека тој во разговорот со истражителите не покажал ни трошка каење, а кога го прашале дали е свесен што направил, тој одговорил: „Да, убив најмалку осум луѓе, а најмногу 25“.
Покрај него, уапсен е и неговиот татко, сопственик на два легални пиштоли со кои е извршен масакрот, а кои, како што соопшти полицијата, изјавил дека под шифра ги чувал во сеф. Но, неговиот син очигледно ја знаел шифрата, а бил и трениран да пука бидејќи, според полицијата, татко му го однел на вежбање на стрелиште. Имаше и приказна дека Коста К. страдал од врсничко насилство, но наводно има само една пријава од него која е обработена.
Милан Милошевиќ од Белград, чија ќерка оди на истиот час со напаѓачот и која во последен момент избегнала куршум, на новинарите им раскажа за драмата што се случила во самата училница.
-Ќерката ни кажа дека ја гледал во очи и пукал на другата страна, а таа се наведнала и истрчала надвор, па отишла да ја бара помалата сестра во второ одделение. Момчето кое истрчало пред неа било застрелано во ногата. Колку повеќе минува времето, толку повеќе ги сфаќаме размерите на оваа трагедија. Не знам што да кажам, ова не е во духот на нашето општество, но тоа е интернетот… – рекол Милошевиќ, кој прво не знаел што се случува, но човек од киоск му рекол дека некој го застрелал наставникот по историја.