Трабантот беше националното возило на Германската Демократска Република (ГДР) – направен од пресуван картон, придвижуван од двотактен мотор и со задушувачки чад зад него, беше најдоброто на кое можеа да се надеваат повеќето Источни Германци.
Денес, за многумина, тој е симбол на социјалистичката мобилност, обожавателите кои поседуваат Трабант сакаат да го покажат, а оние кои не можат или не сакаат да се мачат со одржување сакаат да го видат, пренесува германската новинска агенција. (dpa).
Стотици од нив се собраа на аеродромот во Анклам, каде во средата вечерта започна 29-тиот меѓународен состанок на Трабант.
Претседателот на Trabbi Buggy Club ’93, Јенс Риберг, очекува пристигнување на околу 700 учесници со возила. Програмата трае до недела.
Од 1957 до 1991 година, фабриката во Цвикау произведе околу 3,1 милиони трабанати. Возилото не се променило драматично со децении.
На отворањето во средата вечерта, жирито ги избра овогодинешните Мис и Мистер Трабант, а во наредните денови ќе го избира најдобриот Трабант според различни критериуми.
Покрај тоа, учесниците и гостите ќе можат да се натпреваруваат во фрлање менувач на Трабант, натрупување лименки пиво, рачно влечење Траби и влечење јаже. Врв на настанот ќе биде митингот низ стариот дел на Анклам.
Во сабота навечер ќе има концерт со огномет. Претходните години на собирите на Трабант доаѓаа во просек по неколку илјади гости, главно од Источна Германија.