Корисниците на Фејсбук и Инстаграм наскоро ќе треба да платат за да бидат верифицирани на овие платформи, откако Мета практично го копира потегот на ривалската платформа – Твитер.
Марк Закерберг објави дека воведува Meta Verified, месечна претплата од 11,99 долари за потврда на сметките на платформите, бидејќи големата социјална мрежа поминува низ финансиска криза.
Meta Verified, кој за прв пат ќе биде достапен во Австралија и Нов Зеланд оваа недела, е сличен на системот што го воведе Елон Маск на Твитер, со услуги за верификација на идентитетот и придобивки како што се „директен пристап до услуги на клиентите“.
„Идејата беше да ја подобриме доверливоста и безбедноста на нашите услуги“, рече Закерберг.
Закерберг рече дека покрај сината ознака за проверка, услугата ќе понуди „дополнителна заштита од лажно претставување“, подобрен досег за проверените корисници и директен пристап до поддршката за корисници.
Сепак, за разлика од Твитер, Мета ќе се потпира на лични документи како доказ за идентитетот за проверени сметки, за да го избегне хаосот што Твитер си го создаде кога огромен број корисници се потврдија себеси како некој друг, па дури и како брендови кои изгубија вредност на берзата како резултат на тоа.
Сметките мора да имаат и историја на објавување, а корисниците мора да имаат најмалку 18 години.
„Услугата нема да биде достапна за бизнисите во оваа фаза“, соопштија од Мета.
Зголемената видливост на објавите од проверените корисници „ќе зависи од постојната големина на публиката на претплатниците и предметот на нивните објави“, велат од компанијата.
Оние со помала публика може да видат поголем дофат и подобра интеракција со публиката.