Големо невреме вчера погоди многу делови на Европа и однесе повеќе животи – шест на Корзика, пет во Австрија и двајца во Италија.
Како што јави Ројтерс, град, силен дожд и ветрови кои достигнаа брзина од 224 километри на час вчера рано ја зафатија Корзика.
Францускиот претседател Емануел Макрон свика итен состанок на владата преку видео конференција бидејќи се очекува бурата да трае неколку дена.
Сведоците на утринската бура, која уништи кампови, корнеше дрвја и ги одложи возовите, изјавија дека никогаш не виделе нешто слично на островот.
На француското копно, домаќинствата останаа без струја откако невремето ги погоди јужните департмани Лоара и Аин, додека улиците во Марсеј беа поплавени во средата вечерта, а големи количества вода течеа по скалите во пристанишниот град.
Во исто време, на север, реката Лоара, позната по замоците покрај нејзините брегови, е толку плитка поради сушата што дури и туристичките бродови со рамно дно едвај можеа да се движат низ неа.
Во централна Италија, две лица загинаа во четвртокот од паѓање дрвја, додека силно невреме погоди неколку региони.
Според РСЕ, од паѓање на дрвја во Австрија вчера загинаа пет лица во два одвоени инциденти, бидејќи бурите што претходно во текот на денот ги погодија северните брегови на Средоземното Море стигнаа до алпската земја во попладневните часови.
Две девојчиња, на возраст од четири и осум, загинаа кога дрвја паднаа на работ на езеро во близина на градот Свети Андреас во јужна Австрија, во близина на границата со Словенија, соопшти полицијата.
Се чини дека невремето со налети над 100 километри на час ги изненадило капачите кои се разладувале кај езерото во текот на топлиот ден.
Силното невреме предизвика прекин на електричната енергија поради што австриската национална железничка компанија ОББ мораше да ги прекине сите железнички услуги во повеќето јужни провинции Штаерска и Корушка, кои граничат со Словенија и Италија, се вели во соопштението на ОББ. Затворени се и многу патишта во тие провинции.
Три лица загинаа и од дрво кое падна во областа на градот Геминг во Долна Австрија, провинција околу Виена, изјави портпаролот на полицијата, но не даде дополнителни детали.