Според Вучиќ, интерес на Србија е да има добри односи со Унгарија, а додаде и дека разговорот бил подобар отколку што очекувал.
„Без непријатни тонови, што ме изненади, и што говори дека тој сака добри односи со Србија. Имавме многу добар и значаен разговор“, истакна српскиот претседател.
„Верувам во прагматизмот на господинот Маѓар и верувам дека ќе продолжиме по патот по кој тргнавме вчера. За мене тоа беше многу, многу, многу важен разговор и како одговорен човек, како државник, како претседател на Србија, навистина сум задоволен од тонот што го воспоставивме и од начинот на кој разговаравме“, изјави Вучиќ.
„Ниту тој ги крие своите политички афилијации, ниту јас моите. Ниту ги менувам пријателите, ниту нешто друго, но наш силен и значаен интерес е да имаме добри односи со Унгарија и тоа му го кажав на идниот премиер Петер Маѓар. Тој го кажа истото од нивна страна. И двајцата изразивме желба да продолжиме со блиска соработка и да ја унапредуваме. Разговорот беше подобар отколку што очекував, без никакви непријатни тонови, што ме изненади и што, според мене, покажува решителност на господинот Маѓар да гради добри односи со Србија“, изјави Вучиќ. Додаде дека ни од негова страна немало непријатни тонови и разговорот го оцени како многу добар, значаен и содржаен.
На прашањето за заедничките проекти меѓу Србија и Унгарија, Вучиќ рече дека постојат бројни проекти, како енергетски, така и инфраструктурни.
„Имаме многу проекти. Нашиот гас го складираме во Унгарија, тие се обидуваат да станат сопственици на Нафтната индустрија на Србија, гасот што го добива Унгарија доаѓа преку Србија. И понатаму го имаме проектот за изградба на нафтоводот Нови Сад-Алѓа. Ова се само дел од енергетските проекти. Не ги спомнав ниту железницата, ниту многу други инфраструктурни проекти што нè поврзуваат, а да не зборувам за Унгарците во Србија, Србите во Унгарија и сè останато. Имаме многу работи што нè поврзуваат со Унгарија, први соседи ни се и добро е да имаме најдобри можни односи“, додаде Вучиќ.
Запрашан да ја прокоментира најавата на Маѓар за зајакнување на соработката со Австрија, Вучиќ изјави:
„Не мислам дека тоа е враќање на ‘империјата’, но ако се погледне објективно кога Унгарија најмногу напредувала во својата историја, тоа било по австро-унгарската спогодба, ако не се лажам, во 1867 година. Од тој период до Првата светска војна, тоа е најголемиот подем на Унгарија и тогаш најмногу се градело и земјата најбрзо напредувала. Но не гледам тука никаков проблем за никого. Гледам дека во Брисел нешто инсистираат на тоа, не ја разбрав поентата – човекот сака да има пријателски односи со Полска, Австрија, сè е во ред“, рече Вучиќ.