Премиерот Зоран Заев на својот фејсбук профил изрази голема благодарност до Европскиот Парламент за донесената резолуција со која се бара итен почеток на преговори со Северна Македонија и Албанија.
„Домот на европската демократија повика дека проширувањето е инструмент од исклучително значење за дополнителна европеизација на земјите што природно и припаѓаат на Европската Унија. Македонскиот народ заедно со сите свои сограѓани Албанци, Турци, Роми, Срби, Власи, Бошњаци и други, ќе работиме уште повеќе за да си ја направиме земјата поубаво место за живеење, европско катче на мултиетничкиот Балкан“, напиша Заев.
Тој додава дека Европската Унија знае дека нашето место е во европското семејство и дека ние сме и ќе бидеме подготвени за нивната позитивна одлука.