Во интервју за украинскиот весник „Фокус“, претседателот на Украина, Владимир Зеленски, изјавил дека е подготвен да се бори во случај на „напад“ на Русија од Крим.
„Не сакам ни да помислам на тоа. Јас сум против тоа. Да се надеваме дека тоа е невозможно. Во спротивно ќе биде голема војна. Нема да заминеме, сите ќе се бориме, сите ќе бидат мобилизирани, и мажи и жени“, рече украинскиот претседател.
Според него, ситуацијата би била многу тешка за Украинците, а Русија е свесна за тоа.
Претходно, на украинската телевизија „Прјама“, докторот за социјална економија Зиновиј Свереда изјави дека Украина, за да ги заштити своите интереси, меѓу другото, треба да го крене во воздух мостот Керч и да ѝ приреди „нов Перл Харбор“ на руската флота.
Крим стана дел од Русија во март 2014 година, по референдумот одржан по пучот во Киев. За обединување со Русија гласаа 96,77 проценти од гласачите на Република Крим и 95,6 проценти од гласачите на Севастопол. Украина сè уште го смета Крим за привремено окупирана територија. Според рускиот претседател Владимир Путин, прашањето за Крим е затворено.