Имало и трет напаѓач при нападот во музејот “Бардо” во Тунис. Тој успеал да избега, соопшти претседателот на земјата Бежи Есебси. Другите двајца напаѓачи беа убиени во операцијата за ослободување на заложниците. Властите размножија снимка од безбедносните камери во музејот, од кои станува јасно дека барем еден од напаѓачите носел појас со експлозиви.

Есебси изјави дека пропусти во безбедноста го олесниле смртоносниот напад врз националниот музеј на земјата, за кој одговорноста ја презеде групата “Исламска држава”, пренесе AFP.

“Имаше пропусти”, што значи дека “полицијата и разузнавањето не беа доволно систематизирани, за да ја гарантираат безбедноста во музејот”, рече Есебси во интервју за неделникот Paris Match.

21 лица, од кои 20 странски туристи, загинаа, откако двајца вооружени мажи упаднаа во Националниот музеј Бардо во главниот град Тунис во средата.