Австрија одлучи да инвестира една милијарда евра годишно до 2030 година за да го зголеми производството на електрична енергија од обновливи извори и целосно да ги укине фосилните горива.
„Ние поставуваме основа за климатска неутралност“, рече министерот за животна средина, Леоноре Гевеслер пред парламентот, кој во средата донесе закон за зелена транзиција.
Владејачката коалиција на конзервативната Австриска народна партија (ОеВП) и Зелените сака значително да го зголеми производството на електрична енергија со фотоволтаични системи и ветерни електрани, бидејќи хидроцентралите се веќе широко застапени.
За да се компензира намалената употреба на фосилни горива и да се задоволат енергетските потреби, производството на зелена електрична енергија мора да се зголеми за 27 терават часови.
Владата го смета договорениот пакет за финансирање како прв чекор што треба да зголеми повеќе од 30 милијарди евра во инвестиции во зелениот сектор и предвидува дека ќе се поттикне создавање на 100.000 работни места.
Инвестициите ќе бидат финансирани со зголемување на годишниот надоместок за зелена електрична енергија платена од домаќинства од околу 100 на 115 евра. Домаќинствата со ниски примања ќе плаќаат 75 евра.
Законот беше поддржан од сите партии, освен крајно десничарската Австриска партија за слобода (FPOe), чиј портпарол за енергија Аксел Кастегер предвиде во парламентот дека Австрија сепак ќе мора да увезува фосилни горива во текот на зимата, дури и ако целосно ги спроведе планираните инвестиции.
Тој исто така предупреди дека фотоволтаичните системи ќе опфаќаат земјоделско земјиште и со тоа ќе ја спречат неговата употреба.