Американскиот претседател Џозеф Бајден денеска го обвини својот претходник Доналд Трамп дека претставува постојана закана за американската демократија во говорот по повод годишнината од нападот врз американскиот Капитол од страна на поддржувачите на Трамп.
„За прв пат во нашата историја, претседателот не само што ги загуби изборите, туку се обиде да спречи мирен трансфер на власта додека насилна толпа упадна во Капитол. Но, тие не успеаја“, истакна тој, пренесе АП.
Бајден рече дека демократијата била нападната во Капитол. „Ние луѓето издржавме. Ние луѓето победивме“, додаде тој.
Претседателот и демократите од Конгресот го почнаа денот во Старата сала, едно од ретките места каде што беа „бунтовниците“ пред една година и го прекинаа пребројувањето на гласовите.
„Ти, јас и целиот свет го видовме тоа со свои очи“, рече Бајден.
Тој ги замоли оние што го слушаа да ги затворат очите и да се сетат на она што го виделе тој ден, опишувајќи болна, насилна сцена, маса која ја нападна полицијата, се закануваше на претседателот на Претставничкиот дом, крена бесилка и се закани дека ќе го обеси Потпретседателот, додека Трамп седел во Белата куќа и го гледаше тоа на телевизија.
„Тоа е Божјата вистина за 6 јануари 2021 година“, рече Бајден, додавајќи дека тие сакале да го урнат Уставот.
„Мораме да бидеме апсолутно јасни што е вистина, а што лага. Ова е вистината“, рече тој.
„Поранешниот претседател на Соединетите Држави ширеше мрежа од лаги за изборите во 2020 година“, заклучи Бајден.