Финансиските дубиози во Барселона продолжуваат. Клубот мора да го реструктуира долгот и да ги намали трошоците за да може да ги регистрира играчите кои пристигнаа летово. Засега тоа се Рафиња, Роберт Левандовски, Андрес Кристенсен, Жил Кунде и Франк Кеси, а се споменува и Бернардо Силва, како и уште неколку играчи.
Еден од начините на кои Барселона го намалува делот од расходите што ги издвојува за платите е да се договори со играчите да го одложи плаќањето или дури и да го намали договорот. За време на корона-кризата, токму вака капитените му помогнаа на клубот да опстане. Сега истото се бара и од нив, а според последните информации, Серхио Бускетс е подготвен на тој потег.
Покрај тоа, легендата на „блаугранас“ и на шпанската репрезентација следната сезона би можел за прв пат во животот да ја напушти Барселона. Угледниот шпански новинар Гилем Балагу пишува дека има понуда од МЛС, поточно Интер Мајами, клуб со кој се поврзуваше и Лионел Меси.