Она што јас и моите колеги од ВМРО-БНД го повторувавме деновиве беше поткрепено со дефинитивни докази. Имено, минатата година (не се сомневајте дека дури и сега, во моментот) странските разузнавачи работеле против Бугарија заради нашиот став за спорот со С. Македонија. Не чувствувам никакво задоволство што бев во право, напротив, згрозен сум, објави бугарскиот европратеник Ангел Џамбаски на својот Фејсбук профил, коментирајќи го годишниот извештај за активностите на бугарската Државна агенција за национална безбедност (ДАНС), каде се вели дека во 2020 година странски специјални служби работеле против Бугарија за да ги маргинализираат нејзините надворешно-политички позиции.
Според него, затоа премиерот Зоран Заев и неговите соработници „се толку смирени и покрај постојаната позиција на Бугарија“.
„Некој друг работи за нив. Корекција, некои други, бидејќи во извештајот се споменуваат неколку странски разузнавачки служби. Затоа ние, земјата што најмногу ѝ помогна на братска Македонија во последните децении, сме во навредлив постојан режим на објаснување со Европа. Зборувам за земји кои се дел од ЕУ, од кои некои ја чуваат сопствената валкана долна облека во џебовите, но лицемерно се револтираат што Бугарија влегува во „интимните простори“ на РСМ и го сакаат „невозможното“ од тоа“, наведува Џамбаски.
Тој во својот статус оценува дека методот на странските служби бил да ја дискредитираат Бугарија и да го спречат нивниот најупорен обид во последниве години да ги бранат националните интереси.
„Во исто време, воведувањето на Титовата идеологија заснована на омраза кон Бугарија не само што не се осудува, туку е и поддржано. Каде сме ние!? Во најдлабоките длабочини на Југославија или во срцето на ЕУ?“, прашува европратеникот.
Во извештајот на ДАНС не се посочува кои се тие странски служби, но според наводите, може да се заклучи дека нивните активностите биле насочени против бугарската позиција во спорот за историските прашања со Северна Македонија.