Новиот Правилник за граничните вредности за дозволените нивоа на емисии и видови на загадувачки супстанции во отпадните гасови и пареи кои ги емитираат стационарни извори во воздухот, овозможува инспекторите построго да ги санкционираат загадувачите на воздухот, вели ДОМ во денешното соопштение.

Зелената партија бара од државниот, градскиот и општинските инспекторати, засилени инспекциски контроли и санкционирање на загадувачите, откако смета дека тоа ќе овозможи намалување на аерозагадувањето и заштита на здравјето на граѓаните.

Измената на Правилникот ја иницираше раководителот на градскиот инспекторат во Скопје, Мирослав Богдановски, откако минатата година при инспекциски надзор и извршено мерење биле утврдени покачени емисии од едно правно лице, а постојниот Правилник не давал можност за санкција.

Државниот секретар во Министерството за животна средина и просторно планирање, Ана Петровска организираше формирање на работна група за изменување и дополнување на Правилникот, во која учествуваа стручни лица од Министерството, акредитирани лаборатории, претставници на инспекторатите и здружението на граѓани О2 иницијатива.