Шесте најважни опозициски партии во Унгарија сакаат да учествуваат заедно на парламентарните избори пролетта 2022 година.
Нивната цел е да донесат „промена на епохи“, пренесува денес Дојче веле.
Премиерот Виктор Орбан и неговата партија Фидес веќе десет години доминираат на унгарската политичка сцена. Тој обединува широк политички спектар, од центарот до крајната десница. Со својата статистичка економска политика, тој стана интересен дури и за бројни поранешни гласачи на левичарските партии.
Од 2010 година, Фидес, во сојуз со малата Христијанско-демократска народна партија (КДНП), победи на избори трипати, секој пат со двотретинско мнозинство. Досега, опозицијата во Унгарија немаше начин да се спротивстави на таквата надмоќ. Дури и нејзините претставници во изборните кампањи изгледаа обесхрабрено и парализирано, се наведува во анализата.
Орбан повремено ги исмеваше велејќи им дека за неговиот имиџ и имиџот на Унгарија во странство, таквата слаба опозиција не е добра, бидејќи уште почесто ќе слуша дека тој е диктатор.
Сега унгарската опозиција направи голем чекор. Има намера да стави крај на доминацијата на системот на Орбан со цел да се воведе „смена на епоха“.
За првпат шесте најважни опозициски партии ќе излезат заедно на избори, со заедничка листа на кандидати, како и заеднички кандидат за премиер. Така неодамна одлучија партиите по долга и исцрпувачка дебата. Спектарот на партии во опозицискиот сојуз се протега од лево-прогресивни преку либерално-зелени до национално-конзервативни.
Договорот доаѓа многу рано – изборите се на пролет 2022 година.
Во исто време, била донесена програмска платформа со целите на идната влада. Амбициозниот документ се нарекува „Гаранции за смена на епоха“.
Целите се повторно воспоставување на независно судство и слобода на печатот, транспарентно водење на владините работи со обврска да се објасни трошењето на парите на даночните обврзници.
Планирано е да се донесе нов Устав и изборен закон, да се воведе директен избор на претседател на државата и да се отворат досиејата на поранешните членови и информатори на тајната служба. Покрај тоа, опозицијата има намера да ја надмине длабоката поларизација на општеството.
Заедничкиот изглед на опозицијата е важен од повеќе причини. Со години се караше и се разделуваше. Системот на Орбан ги фаворизира силните партии и е делумно прилагоден на потребите на владејачката Фидес. Затоа, многу експерти ги опишаа изборите во земјата како „слободни, но не и фер“. Во такви околности, само заедничкиот опозициски блок има шанса против партијата на Орбан, пишува ДВ.