Финската државна компанија за електрична енергија „Фортум“ во понеделникот објави дека започнува двегодишна студија за изводливоста за изградба на нови нуклеарни централи во нејзината родна Финска и Шведска.
Европа се обидува да ја зајакне енергетската безбедност на долг рок и да ги намали трошоците откако Русија го намали снабдувањето со гас ова лето поради санкциите со кои западните земји реагираа на нејзината инвазија на Украина и блокадата на опремата на сервисот „Сименс енерџи“.
Иднината на испораките преку гасоводот „Северен тек 1“ потоа беше доведена во прашање поради оштетувањето на цевката при експлозии кои, како што се сомневаат во Европа, се резултат на саботажа.
Намалената понуда на руски гас предизвика скок на цените на берзите за електрична енергија во Европа, па владите почнаа да се враќаат да ги користат електраните на јаглен кои веќе беа затворени, а тие се повеќе се потпираат и на нуклеарните централи.
„Фортум“ ќе ги испита комерцијалните, технолошките и социјалните, вклучително и политичките, правните и регулаторните услови за малите модуларни реактори (SMR) и конвенционалните големи реактори“, соопшти финската компанија во понеделникот.
Оваа година Финска почна да произведува електрична енергија во првата нова нуклеарна централа во Европа пред повеќе од десет години. Се очекува и новата влада во соседна Шведска да претстави план за изградба на нови нуклеарни централи.
„Целите на енергетската независност, безбедноста на снабдувањето и неутралноста на јаглеродот се предизвици со кои се соочува целото наше општество“, рече извршниот потпретседател на „Фортум“, Сајмон-Ерик Олус.
„Сакаме да утврдиме под кои услови можеме да ги постигнеме со производството на нуклеарна енергија, за кое е познато дека е доверливо и не испушта јаглерод диоксид“, рече Олус.