По инвазијата на Украина, довербата во Русија е „изгубена со генерации“, изјави денеска во Киев финската премиерка Сана Марин, чија земја штотуку поднесе барање за влез во НАТО.
„Она што го прави Русија е пресвртница за целото европско семејство и за целиот свет. Гледаме како се уништува стариот систем и нема враќање на старите односи“, рече Марин на заедничката прес-конференција со украинскиот премиер Денис Шмигал.
„Довербата е изгубена со генерации“, додаде таа.
Марин, исто така, разговараше со украинскиот претседател Володимир Зеленски и ги посети Буча и Ирпин, градови во близина на Киев окупирани и напуштени од руската армија, кои станаа симболи на масакри на цивили кои им се припишуваат на руските војници.
„Сега знаеме на што е способна Русија во нејзините агресивни дејства. Сега гледаме какви злосторства предизвикува империјализмот. Гледаме дека ниту едно кривично дело не треба да остане неказнето“, рече таа.
„Важно е Европската унија да биде обединета, храбра и одлучна против руската инвазија“, рече премиерката, се наведува во соопштението на финската влада. Таа додаде дека е важно да се преземат конкретни мерки за да и се помогне на Украина да стане членка на ЕУ.
Шведска и Финска оценија дека треба да се заштитат во НАТО од Русија, подготвени воено да нападнат еден од нивните соседи. На тој начин двете земји ги тргнаа настрана децениската неутралност, а потоа и военото неврзување.